Este saqlaw hám qádirlew – xalqımızdıń joqarı mánawiy pazıyletleri

Búgin Qońırat rayonında 9-may – Eslew hám qádirlew kúni múnásibeti menen “Hásiretli ana” esteligine gúl qoyıw máresimi bolıp ótti.

Hásiretli ana obrazı – bul Watan tımsalı, sabır-taqat hám mártlik belgisi bolıp esaplanadı. Urıstan qaytpaǵan perzentin ómiriniń aqırına shekem kútken ana qálbindegi “Sen bárqulla qálbimdeseń, jigerbentim” degen ármanlı sózler búgin pútkil xalqımızdıń júrek dawısı bolıp jańlaydı.

Máresimde Qońırat rayonı hákimi B.Madaminov, miynet veteranları, awǵan urısı qatnasıwshıları, mámleketlik hám jámiyetlik shólkemlerdiń wákilleri, keń jámiyetshilik qatnastı. Áskeriy orkestrdiń sazları astında “Hásiretli ana” esteligine gúller qoyılıp, qanlı sawash maydanlarında mártlik kórsetip qaytıs bolǵan watanlaslarımızdıń esteligi tereń húrmet penen eske alındı.

Ekinshi jáhán urısı insaniyat tariyxında óshpes iz qaldırǵan qorqınıshlı apachılıq boldı. Ol millionlap insanlardıń ómirine zıyan jetkerip, atanı baladan, ananı baladan ayırdı. Bul qorqınıshlı urıs elimizge de awır joǵaltıwlar alıp keldi.

Sonıń ishinde, Qońırat rayonınan 3672 jerlesimiz frontqa ketken bolsa, olardan tek ǵana 2037 si ana watanına qaytıwǵa erisken.

Búgingi tınısh hám paraxat turmısımız, ashıq aspanımız ushın janın pidá etken ata-babalarımızdıń esteligin qádirlew, olardıń mártligi aldında bas iyiw – biz ushın hám qarız, hám parız bolıp esaplanadı.